Baş səhifə  arrow Yeniliklər arrow 
İnstitut alimlərinin məqaləsi “Statistics, Optimization & Information Computing” jurnalında çap olunub Print
   06 İyul 2018, saat 12:21
Image
AMEA-nın akademik-katibi, İnformasiya Texnologiyaları İnstitutunun direktoru, akademik Rasim Əliquliyev, institutun şöbə müdiri, AMEA-nın müxbir üzvü, texnika elmləri doktoru Ramiz Alıquliyev, şöbə müdiri, texnika üzrə fəlsəfə doktoru, dosent Yadigar İmamverdiyev və böyük elmi işçi, texnika üzrə fəlsəfə doktoru Lyudmila Suxostatın həmmüəllifi olduqları “Weighted Clustering for Anomaly Detection in Big Data” (DOI: 10.19139/soic.v6i2.404) adlı məqalə ABŞ-ın “International Academic Press” nəşriyyatında dərc olunan “Statistics, Optimization & Information Computing” jurnalında çap olunub.

Böyük verilənlər anlayışı olduqca tez-tez yenilənən böyük həcmə və müxtəlif tərkibə malik informasiya ilə işləməyi nəzərdə tutur. Big data-da anomaliyaların aşkarlanması üçün uyğun mexanizmin seçilməsi aktual məsələdir. Məqalədə real Big data-da anomaliyaların aşkarlanması üçün çəkili klasterizasiya əsasında alqoritm təklif edilir. Klasterlərə verilənlər çoxluğunun hər bir nöqtəsinin çəki əmsallarının cəmlənməsi nəticəsində alınmış çəkiləri mənimsədilmişdir. Təklif edilmiş metodun k-means metodu ilə müqayisəli analizi böyük ölçüyə malik verilənlər bazası üzərində aparılmışdır. Eksperimentlərin nəticələri təklif edilən yanaşmanın həm klasterizasiyada, həm də anomaliyaların aşkarlanmasında effektivliyini göstərilmişdir.

Məqalə Azərbaycan Respublikasının Prezidenti yanında Elmin İnkişaf Fondunun maliyyələşdirdiyi “Böyük verilənlər (“Big data”) mühitində informasiya təhlükəsizliyinin təmin olunması metodları və alqoritmlərinin işlənilməsi və onların bəzi tətbiqləri” adlı qrant layihəsi əsasında hazırlanmışdır (Qrant № EİF-KETPL-2-2015-1(25)- 56/05/1).

“Statistics, Optimization & Information Computing” jurnalı “Scopus” (Elsevier), “Crossref”, “Google Scholar”, DOAJ və digər beynəlxalq elmi bazalarda indeksləşir və referatlaşır.

© Bütün hüquqlar qorunur. Xəbərlərdən istifadə edərkən www.rasim.az saytına istinad zəruridir.