Baş səhifə  arrow Yeniliklər arrow İnstitutda antiplagiat sisteminin yaradılması istiqamətində işlər görülür
İnstitutda antiplagiat sisteminin yaradılması istiqamətində işlər görülür Print
   28 Fevral 2019, saat 02:48
Image
AMEA İnformasiya Texnologiyaları İnstitutunun Elmi şurasının iclasında institutun böyük elmi işçisi Rəhilə Həsənova “Plagiatlığın aşkarlanması və onunla mübarizə üsulları” haqqında məruzə ilə çıxış etdi. Plagiatlığın növləri haqqında məlumat verən məruzəçi bildirdi ki, plagiatlıq birbaşa köçürmək, minimalist (mənbə materialından bir neçə söz və ya frazanın dəyişdirilməsi, lakin əsas məzmun və strukturun eyni saxlanılması), birləşdirmək və digər üsullarla həyata keçirilir.

R.Həsənova İnternetdə onlayn olaraq təqdim olunan “Advego Plagiatus”, “Plagiarism Checker”, “antiplagiarism.NET” və s. antiplagiat sistemlərindən söz açdı, plagiatlıqla mübarizə yollarını diqqətə çatdırdı.

R.Həsənova institutda antiplagiat xidmətinin yaradılması istiqamətində işlərin görüldüyünü qeyd edərək institut əməkdaşları tərəfindən təqdim olunmuş məqalələrin yoxlanılması prosesi barədə məlumat verdi, bu prosesin sənədlərin qəbulu, mətnin antiplagiat proqramında yoxlanılması və nəticələrin təqdim edilməsi mərhələlərindən ibarət olduğunu söylədi.

Antiplagiat proqramının iş prinsipindən bəhs edən R.Həsənova onun faylların bir-bir daxil edilməsi, sorğuların cavablandırılması, hər bir axtarış sisteminə görə nəticələrin əldə edilməsini nəzərdə tutduğunu vurğuladı.

Daha sonra AMEA-nın akademik-katibi, AMEA İnformasiya Texnologiyaları İnstitutunun direktoru, akademik Rasim Əliquliyev çıxış edərək institutda antiplagiat sahəsində elmi-tədqiqatların aparıldığını bildirdi, bu istiqamətdə aparılan tədqiqatların daha da dərinləşdirilməsini və dissertasiya işlərinin hazırlanmasını tövsiyə etdi.

Akademik antiplagiatlıq sahəsində institutda peşəkar xidmətin istifadəyə verilməsi istiqamətində işlərin görüldüyünü qeyd edərək qurumda antiplagiat sisteminin yaradılması və tətbiqinin plagiatlıqla mübarizə baxımından böyük əhəmiyyətə malik olduğunu diqqətə çatdırdı.

Məruzə ətrafında gedən müzakirələrdə institutun texnologiyalar üzrə direktor müavini, texnika üzrə fəlsəfə doktoru, dosent Rəşid Ələkbərov, şöbə müdirləri – texnika üzrə fəlsəfə doktoru, dosent Yadigar İmmaverdiyev, iqtisad üzrə fəlsəfə doktoru, dosent Əlövsət Əliyev, texnika üzrə fəlsəfə doktoru, dosent Firudin Ağayev, eləcə də texnika üzrə fəlsəfə doktoru, dosent Şəfəqət Mahmudova və texnika üzrə fəlsəfə doktoru, dosent Ramiz Şıxəliyev çıxış edərək təklif və tövsiyələrini səsləndirdilər.